കയറ്റം

 

അനന്തരം കല്ല് പറഞ്ഞു

'ഇനി ക്രമമൊന്നു തിരിച്ചാലോ?

നിനക്കാണെങ്കിൽ

മന്തൻകാലുമാറ്റം

വിനോദവുമാണല്ലോ '

കോണകച്ചരടിൽ തിരുകിയ

ആറാം നമ്പ്ര്

തീപ്പറ്റിച്ചുപുകച്ച്

ഒന്നാഞ്ഞുവലിച്ച് ചുമച്ച്

പ്രാന്തൻ ഉഷാറായി

'കൊള്ളാം

നേരു പറഞ്ഞാൽ

നിന്നെപ്പോലെ

എനിക്കും ഈ ജഡത്വം

മടുത്തു സുഹൃത്തേ

കർതൃത്വം ആർക്കായാലും

കർമ്മം

ഉരുട്ടലും

ഉരുളലും ആണല്ലോ !'

പ്രാന്തൻ

മണ്ണിൽ കുഴഞ്ഞുരുണ്ട് കിടന്നു

 

ശിലാരൂപി കപടപാദങ്ങൾ നീട്ടി .

രണ്ടു പൊട്ടിച്ചിരികൾ

മുകളിലേയ്ക്ക്

ഉരുളാൻ തുടങ്ങി.