ഉംമ്മ്‌മ്മ്‌മ്മ

ആറുവയസ്സന്ന്

ആയിരുന്നോ?! അല്ല

ആറാംക്ലാസ്സിൽ ?

അതേ ആറാം ക്ലാസ്സിൽ

ഓർമ്മ വന്നു.

വേനലവധിക്കാലമായിരുന്നു

അതോ

ഓണത്തിൻ സ്കൂളടപ്പോ?

ഓർമ്മയില്ല

ബന്ധുവീട്ടിൽ വിരുന്നായിരുന്നു

രണ്ടുനാൾ നിന്നെന്നതോർമ്മ.

എന്തായിരുന്നു വിശേഷം !?

വിവാഹം? പിറന്നാൾ?

കുഞ്ഞു പിറന്നതിൻ നൂലുകെട്ട്?

അമ്പലത്തിൽ ചിറപ്പുത്സവം?

(ഏതോ ചേച്ചി പെണ്ണായ്)

തിരണ്ടു കല്യാണം? മറന്നു.

ഞങ്ങൾ കളിക്കുകയായിരുന്നു

ഞങ്ങൾ, അതേ ഞങ്ങൾ

ഞങ്ങൾ കുറേ കുറേ കുഞ്ഞുങ്ങൾ

ഘോഷം തിമിർപ്പ് .

നല്ല വെയിലായിരുന്നു

തൊടിയിൽ ,മുറ്റത്ത്

നല്ലവെയിൽ.

'നമ്മൾക്കൊളിക്കാം?'

ഒന്നേ തുടങ്ങി എണ്ണുന്നൊരുവളപ്പോൾ

ഒന്നായൊളിയ്ക്കുന്നു ഞങ്ങൾ

വാതിലിൻ പിറകിൽ ,

പൂജാമുറിക്കുള്ളിൽ,

കോണിച്ചുവട്ടിൽ,

തൊഴുത്തിൽ

(മിണ്ടല്ലനങ്ങല്ലേ)

ചുണ്ടിന്നുമേൽ വിരൽ.

പൊന്തും തലകൾ താഴുന്നു

'കണ്ടു!!! ഞാൻ കണ്ടല്ലോ !'

എന്നാരോ കൂവുന്നു

മെല്ലെയെണീക്കുന്ന നേരം

കണ്ണാരോ പൊത്തുന്നു

കൈയ്യു കവരുന്നു.

കൈവെള്ളയിൽ പൂക്കൾ

പൊള്ളുന്നു.......


പൊള്ളുന്നു.