കണ്ണാടി

 

തോളോട് തോളല്ലാതെങ്ങുമില്ല

കയ്യീന്ന് കൈവിട്ടു ശീലമില്ല

അന്യോന്യം നോക്കി

മുഖം മിനുക്കും

ഞങ്ങള് രണ്ടാളും ചങ്ങാതി !

 

ഒറ്റപ്പാത്രത്തിൽ 

വിളമ്പിയുണ്ണും

ഒറ്റപ്പായിന്മേൽ

കിടന്നുറങ്ങും

അത്രമേൽസ്നേഹിതർ ഞങ്ങളെന്നു

ചുറ്റിലെല്ലാർക്കും കുശുമ്പ് കൂട്ടും.

 

പൊട്ടക്കല്ലേറിലറിഞ്ഞു പൊട്ടി

മറ്റുള്ളോർ മുന്നിലെ കണ്ണാടി

ചോറിട്ട കിണ്ണത്തിൽ

വേലികെട്ടി

പങ്കിട്ട പായിലതിർത്തികെട്ടി

കണ്ടിട്ടൊന്നും

പിന്നെ മിണ്ടീട്ടില്ല

ചോദിച്ചിട്ടൊന്നും

പറഞ്ഞിട്ടില്ല .

 

എൻറെയാപ്പണ്ടത്തെക്കണ്ണാടി

എന്നാലുമിപ്പോഴും 

ചങ്ങാതി.

ഞങ്ങള് രണ്ടാളാ  ചങ്ങാതി